Mauno kuno nganiya: Tatak FJP?
Uno aton tataka, tabi?
Nan gamay pa ako, aydol ko si FPJ. Di maihap haw pila ka sine ni FPJ an yatan-aw ko sa Timber City Cinema sanan sinehan sa Moonglow. Labi na haw pistan Tandag, FPJ gayud yaon an salida. Tapos may mga travelling movies pa gayud sa Tago. Bisan nan college na ako sa Cebu, mutan-aw gayud gihapon ako nan sine ni FPJ, labi na an iya Panday series.
Maarang na “tatak” ni FPJ. May iya gayud taraw estilo nan pinusilan na di mahaud nan iban, anay pa haw si Lito Lapid. An mutuyok taraw siya—bang! An mutakilid---ping! An mukalit pag dayang haw dungan kablit nan gatilyo---bang, bang, bang! Ay, ay luoyi si Paquito Diaz kay mahal-id sa gayud siya nan way oras, unsay kapun-an nan saging na yaduog nan bagyo. Pero mas luoyi si Max Alvarado kay an iya hawagi na ilong na singkitar hollow block himuon sa gayud ni FPJ na pertahan nan bala nan iya cuarentay cinco.
Pero sa tanan tatak ni FPJ, an di ko gayud ibaylo yaon pagatawag na makinilya. Ay, ay makinilyahon na gani ni FPJ si Paquito Diaz, matay mo palakpak sa gayud ako. Magsugod kay naa taraw yaon na mag sinumbagay si FPJ sanan si Paquito Diaz. Kulatahon sa gayud naa ni Paquito Diaz si FPJ nan amo dakay kutob. Luoyi si FPJ, magdamiyang an dugo sa bahbah, manhubag an mata. Pero taud taud, kalit mutindog haw mudasmag kan Paquito Diaz. Anhi na dayon an makinilya mo salida. Magsugod si FPJ pagsumbag nan kuob-kuob na kan Paquito Diaz sa suok, padayon an paspasi na sumbag na way undang---anay kibale ga makinilya---mupanik an kinumo ni FPJ sa tiyan ni Paquito Diaz, sa dubdob, sa liog, ug hangtud moabot sa ginawngan na adto ni FPJ ipugpog an pinakakusog na sumbag hangtud mabayud an ginawngan ni Paquito Diaz nan kinulatahay, hangtud matumba siya ug magdupa na unsay inanud nan baha.
Amo lugar ini na tatak ni FPJ an dad-on ni Grace Poe sa Senado? Aya naa siya tuyok adesir labniha si Jamby Madrigal sa rostrum haw makinilyaha? Aduy mag-isan ka kipi an ginawngan ni Jamby. Kailo da.
Haw akoy manga iban ni Grace Poe sa Team Pinoy, kuman pa daan magpasangon na akon artificial abs sa Catalan Tinsmith kay aduy bagan makudo kay an kinabuhi na atubangon ko sa Senado with Grace Poe.
Pero basin sab an mga linya ni FPJ amoy paga pasabot ni Grace Poe na Tatak FPJ na iya dad-on sa Senado. Matay di ko ma imagine haw mag session na sila nan mga Team Pinoy sa senado. Kay di ba 12-0 san target? Demodo sila-sila dan mag atubang sa Senado.
Haw mag privilege speech lugar si Antonio Trillanes, mutindog sa gayud dayon si Grace Poe, haw mulaong: Bilis-bilisan mo, magsimula na ang panibagong paglilitis mo, at ngayon, ako ang huhusga. (FPJ; Ako ang Huhusga)
Obin mag diskursyo taraw si Koko tapos pararon siya ni Grace nan ini na linya: Huwag mo na linlangin ang sarilli mo, Koko anak. Hindi ang katotohanan sa likod nang panlilinlang ni Migs ang hinahanap mo sa kabuuan ng iyong paglalakbay. Ang tunay na hinahanap mo ay kahulugan nang pag iwan sayo ng asawa mo. (FPJ; Aguila)
Tapos haw mo regatyar si Bam Aquino, utdon sa gayud siya ni Grace nan ini na linya: Ang problema sa yo, Bam, huli kang ipinanganak. (FPJ; Kahit Konting Pagtingin)
Tapos mo arangkada dayon taraw si Chiz haw magpakyut, yadi an tubag ni Grace: Sabihin mo na ang gusto mong sabihin, Chiz, pero gusto kong malaman mo na huwag mo nang paikutin ang ulo nang mga magulang ni Heart. Hindi pa tapos ang laban. (FPJ; Hindi Pa Tapos ang Laban)
Mutindug si Alan Cayetano, mo alsa an boses. Mutindug sab si Grace: Alan, kung noon nagtalumpati kang naka salamin, ngayon sisiguraduhin kong magprivilege speech kang may bulak sa ilong. (FPJ: Sa Iyo ang Tondo, Kanya ang Cavite)
Mutindog si Cynthia Villar kay mulaban taraw kan Alan Cayetano. Mulingi kaniya si Grace na an ginawngan gayubit haw mulaong: Kung kayo lang ang magiging kaibigan ko, Cynthia, bibili na lang ako ng aso. (FPJ; Umpisahan Mo, Tatapusin Ko)
O di ba, bibuhin Senado?
Mauno kuno adto nganiya, Grace: Tatak FJP?
Weeh!
